Parket-gula Palla

Getum við ekki verið sammála um að Palla er parket-gul?  Þetta er mjög sjaldgæfur litur á læðu.  Fresskettir eru oft gulir en sjaldan læður.   Þetta kemur sennilega til vegna þess að Palla er eðal-köttur af ætt Bengala.  Þaðan fær hún gula læðu-litinn og svo hefur hún falleg rafgul augu.  Palla er að vísu bastarður.  Í þröngum skilningi þess orðs.  Þegar það er hins vegar haft í huga að Bengalkettir eru afrakstur ræktunar asískra villikatta og amerískra heimiliskatta þá er munurinn kannski ekki svo mikill á Pöllu og "hreinræktuðum" Bengal-ketti.  Hitt er svo annað mál að Palla og móðir hennar Mímí hafa báðar verið teknar úr sambandi svo framhald verður ekki á ræktun þeirra.  Systir Mímíar og frændsystkin eru mörg búsett í Borgarnesi og eru alltaf að fjölga sér eftir því sem ég best fæ vitað.  Þetta eru einstaklega blíðlyndar læður og barngóðar.  Þær sýna aldrei klær þó ömmustrákarnir mínir hnoðist með þær.  Þær hafa þó einstakt lag á að "láta sig hverfa" þegar fjör er farið að færast í leikinn.  Um leið og aftur róast um í bænum birtast þær svo sakleysislegar á svipinn eins og þær vilji segja " við vorum hérna allan tímann."

Fjölskyldumót

Nú er verkefnið að undirbúa fjölskyldumótið norður á Sauðanesi v/ Siglufjörð um helgina. Ég er með smá leynivopn uppi í erminni.  Mun gangast í það á morgun að fullkomna þann gjörning!  Hugsa að margir verði nú ánægðir með það sem ég hyggst fyrir.  Nú er ég hins vegar að prenta út texta o.fl. sem Magga systir er ekki búin að gera.  Hún er nú nánast búin að þessu öllu held ég.  Þegar hún fer af stað þá er það "landið og miðin". Ekkert minna en það.  Við Solla hjálpuðum Trausta að þrífa í dag.  Hann er að flytja inn í íbúðina sína aftur eftir gagngerar endurbætur í kjölfar þess að skipt var um lagnir í húsinu.  Best að vinda sér í undirbúninginn á ný!!!

Afmæli Sollu

Solla systir á afmæli í dag.  Ekki fæst uppgefið um aldur hennar.  Hún er á besta aldri eins og við hin .  Til lukku með daginn Solla systir.

Í dag

Við kláruðum að setja niður í garðana í dag.  Mamma, Guðrún og Solla basa í beði, pabbi á " hliðarlínunni" , við Einar Breki hvílum lúin bein og Einar Breki sjarmör með steina. 

Það voru allir elsku sáttir í dag enda sá Guðrún um verkstjórnina að einróma beiðni okkar hinna.   Snæddum svartfuglsegg hjá mömmu og pabba í hádeginu.  Skelltum okkur svo í leirgerð við Solla og Drífa dóttir Sollu. Einar Breki með og hann stóð sig vel. Ótrúlega yfirvegaður með allar þessar kellur í leirnum krunkandi saman.  Máluðum tvær skálar sem verður spennandi að sjá eftir brennslu. 

Garðbas

Erum með garða í skólagörðum Reykjavíkur.  Það er notalegt að komast út og ata sig allan í mold um leið og maður potar niður kartöflum og grænmeti.  Ég er með einn garð, pabbi og mamma með einn, Kristján Andri og Einar Breki einn, Geir Ægir og Viktor einn,  Solla systir með einn.  Það er líf og fjör og stundum erfitt að koma öllu heim og saman.  Þá stressast liðið upp og fer jafnvel að hnakkrífast.  Pabbi er eins og ég í vandræðum með að bogra.  Þá finnst honum sem hann eigi að stjórna.  Það eru ekki allir sammála því.  Þetta kostar árekstra. Ég segi að ég sé í þessu til að hafa gaman af því og ég reyni að standa við það.  Það er líka erfitt að sitja á hliðarlínunni.  Solla systir var ekki sátt í dag þegar pabbi var að skipta sér af.  Það er margt líkt með skyldum!

Á morgun ætla ég að vera æðrulaus.  Það borgar sig.

Þeyst um á Hafgamminum

Gátum ekki stillt okkur í gær að taka smá rúnt á Hafgamminum sem er lítill og lipur bátur með góðan utanborðsmótor.  Þarna eru Krissi og Guðrún með skæruliðahópinn.

Sigling

Sigldum út í Þerney í gær.  Æðislegt veður og skemmtileg samvera.  Litlu guttarnir voru mjög kátir að komast með ömmu og afa á sjó.  Sofnuðu í notalegu öldugjálfrinu.  Gaman að skella sér aðeins út úr borgartraffíkinni og sigla um sundin blá.

Trausti á afmæli

Elsti sonur minn Trausti Veigar er 32 ára í dag. Það er ekki svo ýkja langt síðan Strákagöngin við Siglufjörð voru opnuð fyrir konu í "barnsnauð".  Þannig var að göngunum var lokað á hverju vori meðan hreinsað (skrollað eins og það var kallað) var laust grjót úr hlíðunum við munnana og einnig inni í göngunum eftir þörfum.  Þetta var gert miðvikudaginn 28. maí 1975.  Ég fór í mæðraskoðun þann dag en fékk að fara heim aftur og sjá aðeins til, sækja dótið mitt og svona því líklegt þótti að fæðingin væri að hefjast.   Þegar ég svo fór af stað um sexleytið stóð heiðursvörður vaskra grjóthreinsunarmanna aðgerðarlaus í hlíðunum og veifaði stelpunni sem var að fara að eignast sitt fyrsta barn í kaupstaðnum.  Pabbi og bræður mínir voru þar á meðal.  Trausti fæddist svo aðfaranótt 29. maí kl 3.20 ef ég man rétt.  Allt gekk vel.  Til hamingju Trausti!

Sólbaðsveður

Það er búið að vera yndislegt veður hér í dag.  Kettirnir brugðu sér því í sólbað.  Þetta lofar góðu.

1.maí

Skruppum austur fyrir fjall í dag.  Ég og Geir.  Fórum í sumarbústað hjá tengdó.  Það var virkilega gaman að fara í smá bíltúr og fá kaffi og með því hjá þeim.  Þau komu svo með okkur í bæinn.  Það var þoka á Hellisheiðinni og dimmt.  Rigndi mildri rigningu fyrir austan og litirnir á móunum mjög fallegir.  Skemmtileg vorlykt í lofti.   Allt að byrja að lifna á ný af vetrardvala.  Hlakka til vorsins og sumarsins.  Vorið heldur innreið sína og  lofar góðu um framhaldið með mildum 1. maí.