Kjalvegur

Þetta er málið og hefur verið í mörg ár.  Man eftir því þegar stórt verktakafyrirtæki vildi leggja veginn á mjög viðráðanlegum kjörum.  Því var hafnað.  Síðan eru liðin mörg ár.  Ýmindið ykkur sparnaðinn sem hefði orðið ef þetta hefði gerst.  Mig minnir að þetta hafi verið fyrir 1990. Bölvuð þröngsýni að vera ekki löngu búnir að þessu.   Segi ég!

Meirihluti landsmanna hlynntur nýjum Kjalvegi samkvæmt könnun

Menn eru dýr

Þarna er enn eitt dæmið um það hvernig menn breytast í dýr og hleypa sínum lægstu hvötum lausum þegar þeir fá aðstæður til þess.  Þá á ég að sjálfsögðu við hermennina og þá sem standa í stríðsrekstri gegn saklausu fólki.  Þetta er enn að gerast allt í kring um okkur.  M.a.s. Gyðingar sem fóru afar illa út úr Helförinni eru sjálfir að myrða fólk í Palestínu og víðar.  Af því þeir hafa "rétt" á því.  Vestrænn heimur styður við og tekur þátt í stríðsbrölti gegn saklausu fólki.  Við horfum á aðgerðarlaus meðan hver "helförin" af annarri fer fram fyrir augum okkar. Við teljum okkur stundum vera að "verja okkur" eða koma í veg fyrir óréttlætið í heiminum.  Við skiljum ekki að með þessu erum við að auka á óréttlætið.  Við getum ekki skapað friðsaman heim með því að drepa aðra og skilja eftir okkur sviðna jörð.   Við verðum að átta okkur á því að til eru menn, fyrirtæki og ríki sem beinlínis græða á stríðsrekstri og meðan svo er verður aldrei friður í okkar annars ágæta heimi.  Vöknum!

„Ég er að breytast í dýr sem langar að deyja"

Kristján Loftsson heiðraður

Gamall sjómaður tók það upp hjá sjálfum sér að heiðra Kristján Loftsson og hvetja hann til dáða á sjómannadag.  Hann mætti ásamt föruneyti á heimili Kristjáns og afhenti honum hvalaskutul sem fannst í fjörunni við Sauðanes v/Siglufjörð.  Um er að ræða flögu úr svokölluðu Brínisbergi.  Það er klettur sem gengur út í sjóinn austan við Sauðanesvitann. Brínisbergið er eitt fárra á landinu þar sem náttúruleg og nothæf brýni hafa fundist.  Á árum áður var sent eftir bríni í hverfissteina flestra Skagfirðinga í umrætt Brínisberg.  Flagan sem Trausti B. Magnússon færði Kristjáni er eins og hvalaskutull í laginu.  Snoturt statíf var smíðað undir skutulinn og hvalur málaður á hann.  Það gerðu sonur Trausta og tengdadóttir.  Kristján og kona hans höfðu gaman af uppákomunni og tóku einstaklega vel á móti gestunum .    

Sjómannadagurinn

Sjómannadagurinn er vart svipur hjá sjón víða um land.  Allt er breytingum háð.  Þó er hann haldinn hátíðlegur.  Eitthvað var um að vera á Siglufirði í gær þar sem myndin er tekin.  Ég fékk hana á vefnum Lífið á Sigló sem er að finna á www.siglo.is

Til hamingju með daginn sjómenn! 

Alcan til Ölfuss

Það munar örugglega um milljarð í tekjur á ári til sveitarfélags eins og Ölfuss.  Hafnarfjörður hefur alveg efni á að missa það samkvæmt atkvæðagreiðslu um málið.  Að vísu upplýsti bæjarstjórnin fólkið í bænum ekki um tekjumissinn sem fylgdi því að álverið færi.  Hafa kannski haldið að hafnfirðingar skildu ekki tölurnar?   Fróðlegt verður að fylgjast með framhaldinu og einnig yfirtökutilboðum sitt á hvað í álbransanum.

Alcan á Íslandi skoðar möguleika á að færa álverið

Nú reynir á

Nú reynir á utanríkisráðherrana. 

Rússar kalla eftir neyðarfundi vegna vígbúnaðarsamnings

Ingibjörg Sólrún

Ingibjörg Sólrún Gísladóttir er vaxandi stjórnmálamaður.  Í viðtali við hana í einhverju blaðanna í dag lýsir hún því að erfiðleikar undanfarinna ára og ákveðin mótbyr hafi þroskað hana sem stjórnmálamann.  Hún sé betri stjórnmálamaður nú en hún var fyrir fjórum árum.  Hún er nú utanríkisráðherra Íslands og mun eflaust marka skýra stefnu í þeim málum.  Það er sennilega kostur að nýr utanríkisráðherra kemur að málum þar sem miklar breytingar hafa orðið í eftir brotthvarf Bandaríkjahers og breyttra aðstæðna í kjölfar þess. Valgerður var þó mikil valkyrja og búin að koma þeim málum í góðan farveg ásamt fyrrverandi Ríkisstjórn.  Heimsmyndin er þó sífellt að breytast ekki síst ef nýtt "kalt stríð" milli austurs og vesturs er í uppsiglingu.  Ýmsar blikur hafa af og til komist á loft í þá veru. Þá er Ísland aftur orðið lykillinn þar á milli.  Því er augljóst að ekkert er fast í hendi og eins gott að vera viðbúin. Ég óska Ingibjörgu Sólrúnu til hamingju og góðs gengis í starfi sínu fyrir land og þjóð.

Íslendingar á tímamótum í öryggismálum

Landsbúnaðarútvegs

Er ekki Laddi forspár.  Nú hefur það gengið eftir sem hann orti í frægu kvæði sínu Austurstræti.  Einar K. Guðfinnsson fær það hlutverk að vinna sameiginlega að þessum tveim elstu atvinnugreinum okkar íslendinga.  Atvinnugreinum sem framan af slógust um vinnuaflið.  Bændurinir höfðu tögl og hagldir löngum og kúguðu fólk til undirgefni.  Höfðu hreðjatak á sjávarútveginum.  Það er gleðiefni að svo er ekki í dag.  Hins vegar hefur landbúnaðurinn farið halloka af haftastefnu stjórnvalda,  kvóta á bú o.s.frv.  Bændur hafa verið sjálfum sér verstir. Í stað þess að standa upp og láta markaðinn ráða hafa þeir látið kúga sig til undirgefni.  M.ö.o. þeir hafa ekki trú á mætti sínum og megin.  Mega ekki bjarga sér.  Hvert leiðir það okkur?  Að ölmusuborði yfirvalda sem hafa ekki ráð í hendi sér bændum til handa.  Ég er sannfærð um það að framsæknir bændur sem hasla sér völl með góða vöru geta vel lifað af afurðum sínum.  Þurfa ekki ríkisstyrki.  Ef þeir þurfa þá ætti það að vera í formi beingreiðslna.  Tímabundið.  Nú er að vinda sér í það að styðja bændur til sjálfshjálpar.  Rétt eins og okkur öryrkjana. 

Guðni treystir Einari best til að taka við landbúnaðarráðuneyti

Kemur alltaf aftur

Jóhanna er seig.  Hún lýsti yfir eins og frægt er "minn tími mun koma".  Jóhanna er talin munu verða í Félagsmálaráðuneytinu næstu tvö ár en muni þá taka við embætti þingforseta af Sturlu Böðvarssyni. Katrín Júlíusdóttir muni taka við af henni en Sturla er orðaður við embætti vegamálastjóra.  Of snemmt er um þetta að spá en óneitanlega verður spennandi að sjá hvernig ný Ríkisstjórn mun sigla þjóðarskútunni.

Magnús afhenti Jóhönnu lykil að velferð skjólstæðinga félagsmálaráðuneytis

Ný Ríkisstjórn

Komin af koppnum og sest að völdum.  Þetta er góður hópur fólks sem ég hef trú á að vinni að velferðarmálum eins og fram kom í kosningabaráttunni hjá báðum þessum flokkum.  Það er fróðlegt að fylgjast með viðbrögðum stjórnarandstöðunnar og maður heyrir strax tóninn í Guðna Ágústssyni.  Hann vill meina að Samfylkingin hafi ekki staðið vaktina með sín stefnumál og að Sjálfstæðisflokkur hafi betur miðað við sáttmálann og verkaskiptingu.  Minna heyrist hins vegar í Steingrími Sigfússyni.  Það hlýtur að vera "lognið á undan storminum".  Guðjón Arnar hefur einnig hljótt um sig.  Það er líka við hæfi að lofa nýju fólki að hasla sér völl.  Ég held að þegar tveir flokkar semja um samvinnu verður að hafa sjónarmið beggja að leiðarljósi og það sýnist mér að sé gert.  Til hamingju með nýja Ríkisstjórn.

Ný ríkisstjórn tekur við völdum