Ég græt ekki "Björn bónda"....

Ég græt ekki þetta stjórnarslit. Ég tel að Ólafur F. Magnússon sé ákaflega heilsteyptur í því sem hann vinnur að. Hann hvikar ekki frá stefnumálum sínum þó það sé hugsanlega auðveldast í stöðunni. Kannski Vilhjálmur ætti að íhuga að hleypa öðrum að þegar kemur að Sjálfstæðisflokki að fá borgarstjórastólinn? Það kemur í ljós.......
Í tengslum við þetta allt saman kemur svo Guðni Ágústsson formaður Framsóknarflokksins fram og segir berum orðum að þeir sem fletta ofan af spillingu í flokknum séu að skaða sjálfan sig! Þessi orð lét hann falla í garð Guðjóns sem kom upp um fatakaup Björns Inga. Hvað um alla hina frambjóðendurna? Sem fengu ekki föt frá flokknum? Common Guðni við eigum ekki að skjóta sendiboðann. Við eigum að leggja spilin á borðin þá fáum við ekkert í hnakkann.

Ólafur og Vilhjálmur stýra

ÖBÍ - Garðarslykt af málinu

Las í Fréttabaðinu að Garðar Sverrisson fyrrverandi formaður ÖBÍ og núverandi formaður Hússjóðs bandalagsins væri mótfallin þeim breytingum að finna önnur úrræði en eina Öryrkjablokk fyrir sjólstæðinga sína. Ég ætla ekki að taka afstöðu til málsins aðra en þá að nefnd sem skipuð var af ÖBÍ til að gera úttekt á því að safna öryrkjum saman í eina blokk komst að þeirri niðurstöðu að óheilbrigt andrúmsloft skapaðist þar sem margir væru atvinnulausir. Því væri æskilegra að finna önnur úrræði fólksins vegna enda bitnar ástandið ekki síst á börnum og unglingum öryrkja.
Þegar ég heyrði um uppsögn Sigursteins Mássonar fyrst hugsaði ég strax "það er Garðarslykt af málinu" enda kom á daginn að hann hefur hagsmuna að gæta sem formður hússtjórnarinnar. Ég þekki vinnubrögð Garðars Sverrissonar og muna kannski einhverjir eftir látunum sem urðu hjá MS-félagi Íslands fyrir um fjórum árum. Garðar var þar.

Sigursteinn Másson er maður að meiri að segja af sér og Hafdís Gísladóttir einnig. Það er einfaldlega ekki hægt að starfa með grafandi moldvörpur allt í kring.

Ég sá einnig í 24 stundum í dag viðtal við Guðjón formann MND félagsins þar sem hann lýsir áhyggjum sínum af stöðunni innan ÖBÍ. Það er líka full ástæða til að hafa áhyggjur af stöðu öryrkja á meðan bullandi hagsmunapotarar eins og Garðar Sverrisson eru einhversstaðar í 10 kílómetra radíus.

Ok Ástþór

Ástþór ætlar kætra Þórunni. Enda ert það svo sem ekki í verkahrign yfirkjörstjóra að tjá sig um framboðsmál eintakra frambjóðenda. Er þó sammála að fjölga ætti á meðmælendalistum til framboðs. Ástþór er líka alltaf með nýja konu sér við hlið svo hann vill greinilega leyfa þeim að spreyta sig. Annars veit ég ekki nógu mikið um kvennamál frambjóðandans annað en það sem kom fram í yfirliti um framboð til forseta geng um tíðina. Þar var Ástþór með sitt hvora konuna sér við hlið frá einu framboði til annars. Kannski er hann með sömu og síðast núna?

Ástþór kærir Þórunni

Er MS geðsjúkdómur?

Maðurinn minn færði mér DV í gær. Þar var viðtal við Margréti Ýr sem er með MS en hefur hætt töku lyfja við sjúkdóminum. Hún stundar og kennir rope joga. Telur sig hafa sigrast á sjúkdóminum með nýju hugarfari og breyttum lifsstíl. Gott og vel. Ég efast ekki um að hún er að gera góða hluti. Þó hríslaðist um mig smá kvíðahrollur. Ég mundi nefnilega þegar ég taldi mig vera lausa við MS. Ég skellti mér í eróbikk! Það reyndist mér ekki vel og ég losnaði ekki við MS þó ég segði það sjálf. Nú vil ég ekki draga úr tiltrú manna á því að hugarfarið skiptir máli. Það gerir það virkilega. Ég hef sannreynt það á sjálfri mér og lít ekki enn á mig sem sjúkling, Þó er ég ekkert viðkvæm fyrir því að vera kölluð MS sjúklingur. Ég set samt alltaf spurningarmerki við yfirlysingar af þessu tagi eins og Margrét Ýr setur þær fram, sérstaklega þegar viðkomandi starfar við það sem hann segir hafa "læknað" sig. Þá eru hagsmunir kannski farnir að lita árangurinn? Það sem mér fannst einkennilegt við umfjöllun DV var viðtal við formanninn Sigurbjörgu Ármannsdóttur. Er hún með viðtalinu að hvetja MS einstaklinga til að hætta að taka þau lyf sem læknar ávísa og rannsóknir sýna að skila gríðarlegum árangri í baráttu fyrir betri heilsu MS sjúklinga?  Hún telur upp þá þjónustu sem MS félagið býður upp á. Það eru námskeið fyrir MS sjúklinga og aðstandendur, sálfræðiaðstoð og svo geðlæknir! Sigurbjörg lét loka göngudeild félagsins, rak taugalæknana en ræður geðlækni til starfa. Kannski er það það eina rétta í stöðunni?  Ég vona bara að þessi geðlæknir setji Sigurbjörgu í viðeigandi meðferð.

Jafnræði á landsbyggðinni

Ég átti gott samtal við Evu hótelstýri á Hótel Djúpavík í dag. Við ræddum margt m.a. fyrirhugaða málverkasýningu sem ég verð með á Hótel Djúpavík frá 1. júní til 15. júlí. Svona cirka. Það var eiginlega svona í lok símtalsins sem eitthvað sem Eva sagði ýtti við mér. Við vorum að ræða snjómokstur á Strandir og hún sagðist vona að eitthvað yrði nú liðkað til og haldið opnu sinni part vetrar eins og gert væri fram að jólum. Þá er rutt tvisvar í viku norður á Starndir. Þetta hættir sem sé um áramót og fram eftir vetri. Oftast. Það sem ýtti við mér var það að svæðið milli Kjörvogs og í Bjarnarfjörð er skilgreint samkvæmt öðrum staðli en t.d. í hinum hluta Árneshrepps. Þ.e. það er ekki mokaður snjór af vegum á fyrrnefnda svæðinu til jafns á við "innan hreppsins", Djúpavík er þó innan hreppsins. Hvað segir samgönguráðherra um þetta misræmi í þjónustu við landsbyggðina? Er Samfylkingarráðherrann sem er í flokki sem kennir sig við jöfnun milli allra og þar á meðal landshluta sáttur við þetta? Það getur ekki verið? Eða hvað?

Gafst upp að bíða

Fór með systur minni að hitta taugalækni í dag. Spurði hann í leiðinni hvað ég ætti að gera í sambandi við lyfið Tysabri sem ég er að bíða eftir að fá. Hann ráðlagði mér, þar sem ég er komin með mikið af gömlu MS-einkennunum aftur að leysa aftur út lyfið Interferon Beta Rebif sem ég var hætt á þar sem það er talið æskilegt að hvíla sig á því fyrir töku á Tysabri. Þvílíkt skipbrot fyrr mig. Heilbrigðisyfirvöld hafa ekki séð sóma sinn í að flýta afgreiðslu málsins þó leyfi sé fengið fyrir nýju og mun öflugra lyfi. Lyfi sem augljóslega skilar meiru, bæði heilsufarslega og fjárhagslega, og þar meina ég fyrir ríkið. Ég sagði við manninn minn og stend við það. Ég mun ekki kjósa Sjálfstæðisflokkin í næstu þingkosningum. Sjálfstæðismenn sem ég kaus í síðustu kosningum eru með málaflokkinn og ég hafði fulla trú á að þeir myndu taka mynduglega á málun en NEI þeir lyppast áfram í gamla farinu, ráðleysi og hrossakaupum innan hins að því er virðist ósigrandi smáríkjasambandi smákónga og drottninga heilbrigðisstofnana. Þátturinn "Já ráðherra" er enn við líði og blómstrar sem aldrei fyrr. Nú í heilbrigðismálum okkar íslendinga!

Lyfið Tysabri – hvar er það statt?

  Ég er MS sjúklingur.  Í október s.l. var mér ráðlagt af taugalækni að hætta á lyfi sem heitir Interferon Beta Rebif og taka mér lyfjahvíld.  Nýtt og öflugra lyf væri væntanlegt.  Ég ætti að fá það ef ég vildi.  Það væri æskilegt að hvíla sig á Rebif í a.m.k. mánuð áður en taka á Tysabri hæfist. Ég ákvað með lækninum að gera þetta.  Rebif hef ég notað með góðum árangri í rúm 10 ár.  Ég beitti mér sem formaður MS félagsins fyrir því að fá skammtinn af Interferon Beta Rebif stækkaðan árið 1998 ef ég man rétt upp í það sem læknar mæltu með og sýnt hafði sig að gagnaði best.  Það var nefnilega gefið í mjög litlu magni fyrstu tvö árin.  Nú hef ég verið lyfjalaus í tvo og hálfan mánuð. Ég hef verið að finna aukin MS einkenni undanfarið.  Einkenni sem ég hef ekki fundið í mörg ár.  Dofa, svima, aukið jafnvægisleysi, ullarsokkafíling (þá líður mér eins og ég sé í of stórum ullarsokkum), þreytu, slen, ógleði þegar ég hreyfi mig o.fl.  Ég ræddi því við taugalækninn minn áðan.  Hann kvaðst ekkert fá að fylgjast með hvar lyfið Tysabri væri statt í kerfinu.  Það eina sem hann vissi væri úr Morgunblaðinu. Ég spyr er þetta hægt?   Hvað er MS félagið að gera?  Jú það er búið að klaga í Norrænu ráðherranefndina.  Hvað gerir Norræna ráðherranefndin?  Á svo kannski bara að fara í mál?

Hvar er nýr heilbrigðisráðherra? Ég hefði haldið að Guðlaugur Þór Þórðarson hefði skynsemi og döngun í sér til að reikna út einfalt skólabókardæmi. Talið er að Tysabri muni kosta samkvæmt Morgunblaðinu  um 100 milljónir á ári fyrir 50 manns. Tökum mig þá inn í það dæmi. Ég ætla nefnilega ekki að leggja það á fólkið mitt að hugsa um mig í erfiðum veikindum.  Þegar ég leggst  inn á spítala sem allt stefnir í, en miðað við líðan mína á ég þar heima og hvergi annars staðar,  kostar það ríkið líklega um 800 þúsund til milljón sólarhringurinn.  Á sérhæfðri taugalækningadeild með steragjöfum og öðrum kostnaði.  MS kast gengur yfir á 4-6 vikum segjum 30 sólarhringa á spítala.  Þrjátíu milljónir út um gluggan og enginn bati?  Bara kostnaður.  Leiða má að því líkum að fleiri MS sjúklingar en ég þurfi aukna spítalavist.  Við erum jú tæp fjögur hundruð á Íslandi.  Segjum að 1/3 þurfi álíka meðferð og ég, sem er varlega áætlað.  Hvað þýðir það?  100 manns á spítala í 30 sólahringa á ári.  3000 milljónir á ári.  Skilar engum smá aukakostnaði fyrir Ríkið.  Enginn bati eða framþróun.  Bara vonleysi og depurð? Stjarnfræðilegar upphæðir! Ok það má fækka dögunum niður í 10 á ári.  Kostanðurinn er samt sem áður gígantískur.  Það er eiginlega alveg sama hvernig dæmið er reiknað.  Tapið er alltaf meira ef lyf sem skila góðum árangri í baráttu við erfiða sjúkdóma eru ekki tekin í notkun um leið og hægt er.  Varanleg fötlun er auk þess afar dýrkeypt fyrir alla aðila. 

En nú veit ég (samkvæmt Morgunblaðinu) að lyfið Tysbri verður leyft eftir áramót.  En hvenær eftir áramót?  Hverjir fá það og hve erfið verður biðin fyrir okkur sem bíðum?

Borgarmálin

Mikið er ég fegin að vera flutt úr borginni!  Við fluttum til Djúpuvíkur í haust en höfum aðsetur í borginni. Eins og þingmennirnir.  Þvílík hagsmunabarátta í kring um Orkuveituna!  Þetta sýnir bara og sannar hve illa slíkir hagsmunir eiga heima á opinberum vettvangi þar sem misvitrir pólitíkusar eru að ráðskast með eigur og tækifæri borgarbúa.  Villi minn Vill hefur ráðið sér algerlega glataða ráðgjafa í þessu máli.  Hver treystir Hauk Leóssyni fyrir svo mikilvægum málum?  Þekktum einkaflippara og eiginhagsmunapotara sem svífst einskis? Nei Villi minn það þýðir nú ekki að koma fram núna og þykjast ekkert vita.  Maður verður að taka ábyrgð á eigin mistökum.  Það að makka með á vafasömum stöðum þýðir bara frjálst fall.  Fólk er eftir allt ekki fífl.  Bingi er ekki heldur heill í þessu máli þar sem hagsmunarotturnar í Framsóknarflokknum hafa bitið sig í hæla hans og hann reynir ekki einu sinni að hrista þær af sér.  Dansar þeirra línu eins og búktalaradúkka. Sammála Svandísi Svavarsdóttur.  Burt með svona vinnubrögð og heyr heyr Svandís fyrir að kæra þennan siðlausa fund.

Pólitískir forsvarsmenn stofnana

 

Ég fór að hugsa enn og aftur um vald pólitískra forsvarsmana stofnana á vegum hins opinbera eftir Ísland í dag - í gær.  Þar skiptust þær Guðrún Elsa Smáradóttir samfylkingu og Þorbjörg Helga Vigfúsdóttir sjálfstæðisflokki á skoðunum um málefni leikskólanna og þá manneklu sem mikið hefur verið rædd undanfarið.  Ég ætla ekki að gera lítið úr manneklunni en ósjálfrátt leitar hugur minn að ástæðum fyrir hve mikið er gert úr henni nú?  Það skyldi þó ekki vera vegna þess að Sjálfstæðisflokkurinn fer með stjórnartaumana í borginnu?  Gæti hugsanlega verið að pólitískir vinstri forsvarsmenn stofnana séu farnir að taka í árar með minnihlutanum í borginni?   Ef svo gæti nú hugsanlega verið hver er þá ábyrgð þeirra?

Og hver er þá ábyrgð þeirra lýðræðislega kjörnu fulltrúa sem spila þannig á stofnanirnar?

Það væri algerlega ólíðandi ef þó ekki væri nema smá stirðleika í að koma börnum á leikskóla mætti rekja til þeirrar ástæðu.  Ég tala nú ekki um ef börn eru send heim til að þrýsta á í flokkspólitískum tilgangi.  Ég þekki sjálf úr heilbrigðisgeiranum tilraunir aðila af vinstri vængnum til að misnota aðstöðu sína í þessum tilgangi.  Þá var Öryrkjabandalagið undir forystu Garðars Sverrissonar búið að fá forstöðumann dagvistar MS sjúklinga Þuríði R. Sigurðardóttur til að spila með í þannig upphlaupi í stað þess að leita lausna hjá þeim sem höfðu með málaflokkinn að gera.

 Nei og aftur nei kæru vinstri-vinir við viljum lausnir í málefnum leikskólannna en ekki pólitískan skrípaleik sem reynir að láta þá sem eru að vinna að málinu líta illa út.  Vona að ég sé að segja einhverja vitleysu en mikið lyktar þetta nú þannig samt. 

Húrra Ingibjörg Sólrún

Þetta er eina vitið í stöðunni.  Flott hjá þér Ingibjörg Sólrún.  Það verður mjög spennandi að fylgjast með framhaldinu.  Við tókum af skarið með sjálfstæði Eystrasaltsríkjanna.  Við eigum einnig að beita okkur friðsamlega í þessu máli.  Það verður að fara á staðinn og láta fólk vita að það sé verið að fylgjast með og að við virkilega viljum raunhæfa lausn þarna.  Það þarf að taka á öllu sínu til þess m.a. að kenna fólki að fyrirgefa.  Það er mikið atriði og mörgum finnst það óhugsandi en samt sem áður er það eina færa leiðin.  Allt annað kallar á meira tilgangslaust blóðbað.

Ingibjörg Sólrún vill heimsækja Miðausturlönd