Tek undir með Bjarkey bloggvinkonu, lesið þetta til enda

 http://visir.is/article/20081025/SKODANIR03/278188353/-1

Ég get tekið undir flest sem Katrín Jakobsdóttir segir í þessari grein.  Nema ég átti þegar ég var lítil stígvél á veturna og gúmmískó á sumrin og svo eina spariskó. Notaði svo ullarsokkana sem mamma og amma prjónuðu í stígvélin á veturna.

Ég tek undir það að jöfnuður er það sem Íslenskt samfélag á að stefna að og ég gæti alveg sætt mig við að tapa einhverjum peningum ef ég sæi þá ganga til samfélagsins.  Því miður er það ekki svo.

Peningarnir okkar eru nú bundnir í "eigum" fjárglæframanna erlendis vegna þess að Íslenska Ríkisstjórnin svaf á verðinum.  

Var ekki starfi sínu vaxin!

 

Mótmælafundur í dag - Rjúfið þögnina

Íslendingar hafa verið niðurlægðir illa undanfarin misseri.  Stjórnvöld fóru í einkavæðingarferli sem þau réðu ekki við.  Íslendingar trúðu því margir og treystu að sú stefna að einka (vina) væða bankana myndi skila okkur góðu búi.  Myndi tryggja okkur glæsta framtíð og börnunum okkar öruggari framtíð.  

Þetta brást og ég ætla ekki að fjölyrða um það hér.  Þetta er búið. Stjórnvöld fylgdu ekki með í útrásinni og Sjálfstæðisflokkurinn rétti seðlabankastjóra völdin rétt sí svona. Furðulegt að Samfylkingin skyldi kokgleypa það?

Það er önnur saga.  Þetta er búið.

Í  kjölfar hörmunganna fylgdi svo þögnin.  Í þau fáu skipti sem Forsætisráðherra hefur ávarpað þjóðina hefur hann talað í véfréttastíl.  Það hefur enginn skilið hann.  

Ingibjörg Sólrún Gísladóttir kom til starfa á ný og var á blaðamannafundi með Forsætisráðherra í gær þar sem þau tilkynntu að gengið yrði til formlegra viðræðna við Alþjóða gjaldeyrissjóðinn.  Það skildist þó það sem hún sagði.  Hún sagði að þau mættu ekkert segja.  Alþjóða gjaldeyrissjóðurinn vildi ekki lesa um það í fjölmiðlum sem um væri rætt áður en stjórn hans tæki málið fyrir.

Þögn.

Þegar á það er litið að það erum við sem erum að tapa hálfri aleigunni, sumir meira aðrir minni þá er þetta forkastanlegt.

Það erum við sem búið er að svíkja og pretta.

Það erum við sem bankarnir hafa hirt peningana af og RÁÐSTAFAÐ AÐ EIGIN GEÐÞÓTTA í skjóli þess falska öryggis sem Ríkisstjórnin skapaði kring um þá.

Svo á bara að þegja málið í hel!

Hvet fólk til að mæta og mótmæla þögninni.  Fundurinn er á Austurvelli kl. 15.00

Mótmæla þögninni sem er svo skerandi við þessar aðstæður. 

 

Björgunarsveitin strax í að bjarga

Þegar hamfarir ganga yfir landið eru kallaðar út björgunarsveitir.  Eins og vera ber til að forða stórtjóni. Það eru einnig til aðgerðaáætlanir til að fyrirbyggja með öllum hugsanlegum leiðum stórtjón.

Hvers vegna gilda aðrar reglur um fjármálamarkaðinn?  Er það tjón eitthvað minna en beint tjón á mannvirkjum og farartækjum?

Hvernig væri að menn gerðust nú sjálfboðaliðar í að bjarga því sem bjargað verður í efnahag þjóðarinnar í stað' þess að "njóta"  bara "áramótabrennunnar"?

--

Ég bið fyrir sjómönnunum okkar í þessu veðri sem nú geysar og einnig öðrum sem þurfa að vera á ferli.

--

Ég bið einnig fyrir okkur Íslendingunum öllum sem erum að horfast í augu við aulalegt hrun Íslensks efnahagslífs.  Það aulalegasta mistök sem nokkur stjórnvöld í vestrænum heimi hafa gert.

Kannski bið ég m.a.s. fyrir þeim sem bera ábyrgð á því. 

Seinna..... 

 

 

Reyna að afstýra stórtjóni

Samtalið sem setti allt á hvolf milli ríkjanna

Það er gott að fá þetta samtal fram í dagsljósið.  Sitt sýnist hverjum.  

Þarna hefur greinilega verið of eldfimt ástand fyrir hreinskilni Árna.  

Fjármálaráðherra verður að gæta að sér og ekki segja neitt sem getur útlagst á versta veg.

Það er ljóst og var reyndar ljóst fyrir þetta viðtal sem mér virðist dálítið heimóttlegt af hálfu Árna, því miður. 

 

 

Samtal Árna og Darlings

Ég kýs Jón Badvin

 Ég hvet alla sem til að gefa sér tíma til að fara inn á síðu Sverris Stormskers og hlusta á þáttinn Miðjan sem hann er með á Útvarpi Sögu.  Þar er viðtal við Jón Baldvin Hannibalsson og Sverrir hvetur hann til að gefa kost á sér í Íslensku pólitíkinni á ný.

Ég tek undir með Sverri og er handviss um það að Jón Baldvin er einn af fáum ef ekki sá eini hér á landi sem getur svo einhver sómi sé að talað máli okkar Íslendinga á alþjóðavettvangi.

Hrist af okkur slyðruorðið!  

Þess vegna er það von mín og trú að Samfylkingin ætti að fá umboð til að vera í minnihlutastjórn fram að næstu kosningum og kalla Jón Baldvin inn sem utanríkisráðherra.

Jafnvel sem forsætisráðherra ef það  er mögulegt.

 

Flón á Fróni

Í fréttum stöðvar 2 klukkan 22.00 var rætt við prófessor við Chicago háskóla Robert Z. Aliber .  Ég vísaði í grein hans hér á síðunni fyrr í dag þar sem kemur fram hans álit á efnahagshruninu á Íslandi.  Í fréttunum sagði hann að það myndi enginn taka mark á íslendingum ef þeir breyttu ekki um stjórn á efnahagsmálum sínum og bætti við að það hefðu greinilega verið flón, fools = fífl við stjórn landsins undanfarin 2-3 ár.

Það er erfitt að stjórna þegar forveri manns situr í baksætinu og rífur í stýrið þegar honum þóknast.  

Það verður að gera þá kröfu á menn sem bjóða sig fram til þvílíkra trúnaðarstarfa fyrir landið sitt að þeir ráði við það.

Ráði við að taka á málum en bíði ekki eftir að þau leysi sig sjálf.

 Það er feillinn!

Það er dýrkeypti og sorglegi feillinn!

Geir H. Haarde á að segja af sér nú þegar fyrst hann réð ekki við málið.

Við erum hlægileg í augum alheimsins! 

Saklaust fólk líður nú vítiskvalir fyrir aðgerðarleysi og getuleysi þeirra kumpána Davíðs og Geirs og allra hinna.

Fyrsta verkefni nýrrar ríkisstjórnar á að vera að ákveða að bæta fólki það tjón sem núverandi stjórn hefur valdið.

Alveg eins og að bæta Bretum þá getum við bætt okkar fólki ævistarfið og sparnað sinn sem veruleikafirrt fólk á ofurlaunum  hefur sóað. 

Ingibjörg mætt - hún er leiðtogi

Svona yfirlýsingu hefði ég viljað heyra forsætisráðherra gefa fólkinu í landinu.  

Það þýðir ekkert að læðast með veggjum og halda að hlutirnir leysi sig sjálfir og að fólk sé svo "heimskt" að það þurfi ekki skýringar.

Enda hefur verið "áramótabrenna" á verðmætum þjóðarinnar á undanförnum dögum og stjórnvöld, því miður, í einhverjum hægagangi.

Jón Baldvin Hannibalsson sagði í Silfri Egils í því samhengi og hafði það eftir vinum sínum innan Sjálfstæðisflokksins að Davíð Oddsson væri að tefja málið gagnvart Alþjóðagjaldeyrissjóðnum eða eins og Jón Baldvin orðaði það "að þvælast fyrir á strandstað"!

Á meðan brenna sem svarar öllum rekstrarkostnaði Landspítalans daglega! 

Velkomin heim Ingibjörg Sólrún og  takk fyrir þetta. Við metum það mikils að fá sannleikann fram.  Þá er hægt að haga seglum eftir vindi.  Jafnvel sigla beitivind!

Ingibjörg Sólrún: Erfiður vetur framundan

Söfnum liði

Silfur Egils var alveg frábært í dag.  Skemmtilegir menn eins og Pétur Tyrfingsson krydda tilveruna og ég er algerlega sammála honum að nú þarf alþýða þessa lands að flykkjast inn í verkalýðsfélögin og nota öll þau vopn sem þau hafa til að rétta hlut sinn.  Klóra í bakkann, hafa sig upp á hann og endurheimta virðingu sína, það sem það hefur lagt til þjóðarbúsins og hreinlega innistæður sínar og lífeyrissjóði.  Skapa betri framtíð fyrir börnin okkar.  

Einnig dáðist ég að háskólakennaranum (tölvufræðingi) náði ekki nafninu hans en tók eftir að hann hefur sama kæk og ég! Hann kom með góða og áður órædda punkta inn í umræðuna.  Ferskur!

Við eigum að rísa upp og segja hingað og ekki lengra.

Egill Helgason á heiður skilið fyrir þessa þætti. Það er einnig ágætt viðtal við hann í Helgarblaði DV þar sem hann hvetur til samstöðu og að fólk safni liði til að vinna okkur upp úr þessu ástandi sem við erum komin í.  Ég tek undir það og mun ekki láta mitt eftir liggja ef af því verður.

Jón Baldvin Hannibalsson kom svo í lok þáttarins í viðtal og ég segi nú bara við þurfum virkilega á honum að halda hér á Íslandi núna.

Ég myndi vilja kjósa upp á nýtt hið fyrsta koma honum í framvarðarsveit ásamt öðru góðu fólki sem er nú í eldlínunni og ekki síður nýju öflugu og óspilltu fólki.

Jón Baldvin væri flottur forsætisráðherra! 

Hann er vel kynntur meðal þjóða og einhver öflugasti og gáfaðasti maður sem við gætum teflt fram núna. 

Þjóðin er í losti núna en við munum rísa upp og sýna samstöðu fljótlega.  Það hefur vantað aðhald frá grasrótinni á undanförnum árum.

Ég mun mæta fyrst manna á þverpólitískan baráttufund verði til hans stofnað. 

Virkjum fólkið! 

Áfram Ísland. 

Viljum við það?

Nú sitja stjórnmálaflokkarnir á rökstólum og skipta með sér kökunni.  Því sem eftir er.  Makka í bakherbergjum eftir yfirtöku bankanna hvaða fyrirtæki eigi að lifa og hvaða fyrirtæki ekki.

Ljóst þykir að mörg fyrirtæki muni leggja upp laupana á næstu misserum.  Þeir sem eru pólitíkusunum "þóknanlegir" eiga því væntanlega meiri möguleika en aðrir.

Nú mun landið aftur skiptast í pólitískar blokkir líkt og Kolkrabbann og Sambandið.  40 ár aftur í tímann. Eins og hendi veifað.

Viljum við það?  Erum við spurð? 

Það er ekki skrýtið að markaðurinn í heiminum bregðist hart við!

Og það er ekkert skrýtið að efnahagsráðgjafi Ríkisstjórnarinnar segi upp störfum í "sjoppunni". 

 

 

Heyr heyr

 Þingmaður frá Grimsby tekur upp hanskann fyrir Íslendinga

 Af Visir.is 

Austin Mitchell, þingmaður breska Verkamannaflokksins frá Grimsby, segir að breska ríkisstjórnin hafi brugðist Íslendingum á þeim erfiðu tímum sem þjóðin gengur í gengum.

Hann efndi til utandagskrárumræðu um málefni Íslands á breska þinginu í gær þar sem hann sagði að Bretar hefðu átt að styðja við og hugga Íslendinga í kjölfar bankahrunsins. Það hafi yfirvöld ekki gert, heldur þvert á móti aukið á vandræði Íslands.

„Ísland á miklu betra skilið og þar á stuðningi okkar að halda í þeim vandræðum sem landið stendur nú frammi fyrir," sagði Mitchell og bætti því við að Íslendingar væru gamlir bandamenn Breta og vinaþjóð."