Ég er þakklát

Ég er þakklát fyrir það sem mér hefur hlotnast í lífinu.  Þakklát fyri það uppeldi sem ég fékk. Að alast upp við ysta haf í mikilli einangrun en finna aldrei fyrir því að vera einn.  Samheldni fjölskyldunnar var slík.  Það var ekki fyrr en vegurinn kom að við fórum að tvístrast.  Sem betur fer kannski.  Samheldni okkar í uppeldinu hefur þó haft þau áhrif að ég held að við systkinin búum að því áfram.  Þó það lengist á milli um tíma þá "kippum við í spottann" um síðir.  Römm er sú taug.

Ég er einnig þakklát fyrir að eiga "fjallhressa" foreldra.

Ég er þakklát fyrir að hafa eignast marga góða vini og vinkonur á skólaárunum og í gegn um lífið. Það er ómetanlegt að eiga góðan vinahóp og ekki síðra hve ólíkir einstaklingar eru í þeim

hópi.  Lífið verður svo litríkt og skemmtilegt þegar maður hefur svo breiðan hóp að tala við í gleði og í sorg.

Ég er þakklát fyrir það samferðafólk sem ég rekst á í lífinu til lengri eða skemmri tíma.  Það er nefnilega ekki lengd samverunnar sem skiptir öllu máli heldur er það hvernig maður nýtir þær stundir sem maður fær. 

Ég er þakklát fyrir manninn minn og fyrir syni mína og tengdadætur sem eru mér öll mjög mikils virði.  Án þeirra og kærleikans sem þau gefa mér væri ég ekki neitt.  Ég er þakklát fyrir ömmustrákana mína sem eru sem perlur af himnum sendir.  Skynsamir, duglegir og góðir.  Sundum BARA duglegir og kraftmiklir.  Svoleiðis á það að vera.  Engin lognmolla í "ömmuhúsi".

Jólin verða því fjörug, lífleg og umfram allt kærleiksrík okkur öllum.

Ég er þakklát.

Knús í allar áttir.

Kringlan-verslum í heimabyggð.

Fórum okkar árlegu Þorláksmessuferð í Kringluna í kvöld hjónin.  Keyptum eina jólagjöf saman og síðan fengum við okkur kaffi og crosant í Kaffitár. Nutum þess að vanda að horfa á fólkið streyma hjá í ýmsum erindagjörðum tengdum blessuðum Jólunum.  Ég fékk svo lánaðan fót hjá manninum mínum og keypti flotta skó á hann í jólapakkann.  Við erum sem sagt "Kringlufólk".....á Þorláksmessu a.m.k.

Fyrir nokkrum árum hafði ég gjarnan á orði eins og títt er um landsbyggðafólk að verslað skyldi í heimabyggð.  Við vorum t.d. og erum enn mikið á Ströndunum á sumrin.  Leggjum við af fyrrgreindum ástæðum áherslu á það að versla í heimabyggð. 

Einu sinni sem oftar þurfti maðurinn minn að kaupa sér sjúkrakassa  í skútuna.  Hann kannaði verðið á ýmsum stöðum og komst að því að hann var ódýrastur í Hafnarfirði.  Þetta fannst honum skrýtið og fór í Kringluna þar sem hann var dýrari.  Hann spurði, og sagði að þar sem hann vildi gjarnan versla í sinni heimabyggð, hvort hann fengi ekki sjúkrakassan á sama verði og í Hafnarfirði?  Það hreinlega datt af þeim andlitið, þetta höfðu þeir ekki heyrt áður, hlógu svo og sögðu að auðvitað fengi hann þetta á sama verði og í Hafnarfirði.

Gleðileg jól

Ég ætla að njóta lífsins um hátíðarnar.  Hér verður "fullt hús" á Aðfangadagskvöld.  Allir strákarnir okkar koma til okkar með fjölskyldur sínar.  Það verður því "kátt í höllinni". 

Sendi mínar bestu jóla og nýársóskir til ykkar allra.  Skjáumst hress um eða eftir jólin. 

Læknafélagið setur niður

http://dagskra.ruv.is/streaming/sjonvarpid/?file=4365573/0

Ég hef fylgst með þessu máli og verð að segja það að læknafélagið setur stórlega niður við sína gjörninga.

Það lætur niðrandi ummæli Jóhanns Tómassonar um Kára Stefánsson standa á vefsíðu sinni. 

Á sama tíma úrskurða siðanefnd þess að Kári Stefánsson hafi brotið siðareglur Læknafélagsins þegar hann reyndi að bera hönd fyrir höfuð sér.

Formaður Læknafélagsins Birna Jónsdóttir reynir svo á lítt sannfærandi hátt að þvo hendur sínar af málinu.  Henni tekst kannski að gera það á þann veg að nú veit alþjóð að hægri hönd Læknafélagsins virðist ekki vita hvað sú vinstri er að gera.  Er það traustvekjandi?

Jólin-Tysabri- áramótin

Nú líður að jólum.  Hef verið að kaupa jólagjafirnar sem voru eftir.  Fór upp í Mosó að kaupa eina í gær.  Segi ekki meir. Við Solla tókum til hjá mér í fyrradag og daginn þar áður. Tókum tölvuherbergið og borðkrókinn.  Endurhönnuðum ýmislegt.  Solla þjálfuð í þessu.  Allt voða fínt.  Fjórir dagar til jóla segir Mogginn.  Ekki lýgur Mogginn.  Föndur í dag með tengdadóttur og barnabörnum. 

Tysabri

Setti inn hér færslu um daginn varðandi lyfið Tysabri og MS.  Hef ekkert frétt enn af stöðu mála.  Leiðrétti mig aðeins í þeirri færslu þar sem ég setti inn allt of lága summu miðað við  þann kostnað pr. mann sem ég lagði upp með.  Beið eftir að aðrir gerður það en gerði það svo sjálf þegar enginn annar gerði það.  ;-)

Ég setti að vísu kostnað í hærri kantinum en ef við lækkum hann niður í 500 þúsund daginn (lægri upphæð, með engum sérkostnaði) samkvæmt heimasíðu LSP erum við samt sem áður með fimmtán hundruð milljóna kostnað fyrir ríkið, miðað við lengri innlagnir vegna lyfjaleysis MS sjúklinga.  Þá er verið, samkvæmt þessu, að kasta krónunni fyrir aurinn í orðsins fyllstu merkingu.  Spara 100 milljónir en sóa á móti 1400, já fjórtán hundruð milljónum.

Leiðrétting óskast ef ekki er rétt með farið!

Áramótin

Ég bíð spennt eftir áramótunum, af fleiri en einni ástæðu!

Ég lítil

  

Byrjuð að labba

innskeif

 

Dett um tærnar

á sjálfri mér

 

Feit

 

Með stór

forvitin augu

 

Augnahár

eins og blævængi

 

Sæt

 

Sjálfri mér lík

 

 

      Vilborg Traustadóttir

Lyfið Tysabri – hvar er það statt?

  Ég er MS sjúklingur.  Í október s.l. var mér ráðlagt af taugalækni að hætta á lyfi sem heitir Interferon Beta Rebif og taka mér lyfjahvíld.  Nýtt og öflugra lyf væri væntanlegt.  Ég ætti að fá það ef ég vildi.  Það væri æskilegt að hvíla sig á Rebif í a.m.k. mánuð áður en taka á Tysabri hæfist. Ég ákvað með lækninum að gera þetta.  Rebif hef ég notað með góðum árangri í rúm 10 ár.  Ég beitti mér sem formaður MS félagsins fyrir því að fá skammtinn af Interferon Beta Rebif stækkaðan árið 1998 ef ég man rétt upp í það sem læknar mæltu með og sýnt hafði sig að gagnaði best.  Það var nefnilega gefið í mjög litlu magni fyrstu tvö árin.  Nú hef ég verið lyfjalaus í tvo og hálfan mánuð. Ég hef verið að finna aukin MS einkenni undanfarið.  Einkenni sem ég hef ekki fundið í mörg ár.  Dofa, svima, aukið jafnvægisleysi, ullarsokkafíling (þá líður mér eins og ég sé í of stórum ullarsokkum), þreytu, slen, ógleði þegar ég hreyfi mig o.fl.  Ég ræddi því við taugalækninn minn áðan.  Hann kvaðst ekkert fá að fylgjast með hvar lyfið Tysabri væri statt í kerfinu.  Það eina sem hann vissi væri úr Morgunblaðinu. Ég spyr er þetta hægt?   Hvað er MS félagið að gera?  Jú það er búið að klaga í Norrænu ráðherranefndina.  Hvað gerir Norræna ráðherranefndin?  Á svo kannski bara að fara í mál?

Hvar er nýr heilbrigðisráðherra? Ég hefði haldið að Guðlaugur Þór Þórðarson hefði skynsemi og döngun í sér til að reikna út einfalt skólabókardæmi. Talið er að Tysabri muni kosta samkvæmt Morgunblaðinu  um 100 milljónir á ári fyrir 50 manns. Tökum mig þá inn í það dæmi. Ég ætla nefnilega ekki að leggja það á fólkið mitt að hugsa um mig í erfiðum veikindum.  Þegar ég leggst  inn á spítala sem allt stefnir í, en miðað við líðan mína á ég þar heima og hvergi annars staðar,  kostar það ríkið líklega um 800 þúsund til milljón sólarhringurinn.  Á sérhæfðri taugalækningadeild með steragjöfum og öðrum kostnaði.  MS kast gengur yfir á 4-6 vikum segjum 30 sólarhringa á spítala.  Þrjátíu milljónir út um gluggan og enginn bati?  Bara kostnaður.  Leiða má að því líkum að fleiri MS sjúklingar en ég þurfi aukna spítalavist.  Við erum jú tæp fjögur hundruð á Íslandi.  Segjum að 1/3 þurfi álíka meðferð og ég, sem er varlega áætlað.  Hvað þýðir það?  100 manns á spítala í 30 sólahringa á ári.  3000 milljónir á ári.  Skilar engum smá aukakostnaði fyrir Ríkið.  Enginn bati eða framþróun.  Bara vonleysi og depurð? Stjarnfræðilegar upphæðir! Ok það má fækka dögunum niður í 10 á ári.  Kostanðurinn er samt sem áður gígantískur.  Það er eiginlega alveg sama hvernig dæmið er reiknað.  Tapið er alltaf meira ef lyf sem skila góðum árangri í baráttu við erfiða sjúkdóma eru ekki tekin í notkun um leið og hægt er.  Varanleg fötlun er auk þess afar dýrkeypt fyrir alla aðila. 

En nú veit ég (samkvæmt Morgunblaðinu) að lyfið Tysbri verður leyft eftir áramót.  En hvenær eftir áramót?  Hverjir fá það og hve erfið verður biðin fyrir okkur sem bíðum?

Stjörnuspá

Ég!!!

Steingeit: Er þetta ástarsamband þess virði að taka áhættuna sem það felur í sér? Hvað með brothætt hjarta þitt? Rómantík er fyrir þá djörfu. Kýldu á það í kvöld.

....

Maðurinn minn!!!

Hrútur: Þú ert óhræddur við að vera vondi gaurinn. Takmörk þín og væntingar eru á hreinu. Þú veist hvers þú þarfnast og kannt að nálgast þá sem geta veitt þér það.

....

Framhald í næstu viku.....

Vindur um nótt

 

Ég og náttúran

verðum

oft og tíðum

eitt

 

Einhvernveginn

finn ég

samhljóm

í þögninni

 

Og þegar

vindurinn blæs

ólgar blóð mitt

af brennandi

þrá....

 

 

             Vilborg Traustadóttir

Slegin út - ekki af.....

Vaknaði í morgun eftir tveggja sólahringa nánast samfelldan svefn.  Fékk einhverja fjárans pest aðfaranótt mánudagsins.  Þetta var gubbupest með háum hita og ég var nær meðvitundarleysi en meðvitund þó ég væri að staulast fram með dyggum stuðningi bóndans.  Gerði svo bara eins og dýrin.  Hætti að borða og drakk aðeins vatn í rúman sólarhring.  Er öll að koma til en frekar slöpp ennþá.  Það er óspennandi að lenda í svona pestum, það er mjög langt síðan ég hef fengið eina slíka.  Mörg ár.  Hlaut að koma að því.  Ég er sennilega heppin að liggja einungis í tvo sólarhringa.  Hef heyrt um marga sem fara illa út úr pestum þessa dagana. 

 Annað er það að frétta að vörurnar sem ég hef verið að viða að mér á E -Bay streyma nú í hús hver af annarri.  Ég tók törn að panta meðan ég var á Heilsustofnun NLFÍ í Hveragerði og bauð grimmt í alls kyns playmobil skip og bíla.  Þetta er voðalega vinsælt meðal ömmustrákanna og m.a.s. afinn er sáttur!  Ég gekk svo hart fram í að panta að ég var komin með sjálfvirkt boð á sumar vörur sem þýddi minna stress að vaka yfir vörunni þegar leið að lokum uppboðstímans.  Enda var dvölin í Hveragerði hugsuð í bland sem hvíldardvöl. Hvað um það hér hefur verið stofnað Zoega-skipafélagið og einungis er eftir að semja texta og stef sem fellur vel að nafninu.  Ef einhver áhugasamur höfundur sér þetta endilega bara að spreyta sig!

 

Kær kveðja vinsælasta amma í heimi þessa dagana.......