Auðvitað eiga þeir að svara fyrir gerðir sínar - allir

Auðvitað eiga þeir sem leitt hafa okkur í þá kreppu sem við öll nú sitjum í að svara fyrir gerðir sínar.

Þegar stjórnvöld hafa reynt að bæta fyrir það sem farið er og bjargað því við sem við höfum treyst bönkunum fyrir.  Bönkunum sem stjórnvöld einkavæddu og áttu að hafa eftirlit með.  Þá eða jafnvel samhliða þeirri vinnu eiga þau að láta rannsaka dæmið og sækja þá menn til ábyrgðar sem þeim ber.

Mér finnst með eindæmum grátlegt að forstjórar banka hafa á síðustu metrunum eitt sem svarar ævisparnaði venjulegs launafólks og vel það í glæsivillur erlendis!

Við viljum ekki hafa það að þessir menn hafi markvisst látið beina sparnaði okkar og lífeyrissjóðum í þann farveg þar sem það er aðgengilegt fyrir þá sjálfa að braska með og jafnvel stinga í eigin vasa.

Ríkið sá um einkavæðingu bankanna og eftirlit með þeim og hefur ekki tekist sem skyldi.  Vægast sagt. 

Ríkið verður að bæta upp þessa handvömm og sækja síðan þá menn til ábyrgðar sem ábyrgð eiga að bera. 

Hvað um þá sem tapað hafa ævisparnaðinum?

Mikið er ritað og rætt um bankakreppuna á Íslandi.  Mér finnst ekki mikið hafa komið fram hvað verður um það fjármagn sem fólk hafði í sveita síns andlits lagt fyrir í lífeyrissjóðum bankanna.

Það er eins og það sé eitthvað lögmál að þeir séu brunnir upp.

Hefur ríkið engin úrræði til að endurvinna það gríðarlega fjármagn sem þar hefur verið lagt fyrir?

Eitt er víst að það fólk sem þar hefur lagt til hliðar til að eiga í sig og á á efri árum mun eftir hrunið eiga erfitt uppdráttar.  Þetta fólk hefur eins og allir aðrir greitt skatta sína og skyldur til ríkis og sveitarfélaga.

Það hefur sýnt forsjálni, að það hélt, til þess einmitt að verða ekki upp á ríki og sveitarfélög komið í ellinni.

Það er alveg ljóst að ríkið verður með einhverjum hætti að koma að þessu máli t.d. með því að afhenda lífeyrissjóðunum Kaupþing geng því að þeir yfirtaki réttindi þessa fólks. 

Þetta mál er mjög brýnt og verður að leysa á þann hátt að allir beri sem minnstan skaða því það er líka skaði fyrir hið opinbera að fá þessa lífeyrisþega af fullum þunga til sín, lífeyrisþega sem einnig geta og hafa létt undir með afkomendum sínum. 

Á mánudaginn?

Maður verður að vera bjartsýnn.  Þó allt sé í kalda koli.  Það er verið að vinna ötullega að því að bjarga því sem bjargað verður.  Hinu verður ekki bjargað.

Það eru margir sem hafa þá trú að þegar um hægist verði þjóðin okkar ennþá sterkari, hamingjusamari og samheldnari.

Má vera.

Kannski er það mikið lán að tapa aleigunni?

Kannski neyðir það fólk til að endurmeta það sem skiptir virkilega máli?

Eitt er víst að tími óvissu og þrenginga eru framundan hjá mörgum okkar og ekki er útséð um hvað verður.

Fréttaflutningur hvetur ekki til bjartsýni, þvert á móti.  Markaðir hríðfalla og fleiri þjóðir sjá fram á mikil vandmál og gjaldeyrisskort.

Kannski er ekkert slæmt að vera fyrst í röðinni?

Fá vonandi alla þá aðstoð sem við þurfum og getum risið öflugri sem aldrei fyrr upp úr sviðinni slóð útrásarinnar. 

Kannski er ekki slæmt að sjá hverjir eru vinir manns og hverjir ekki?  Það eru ekki vinir sem sparka í þann sem er útafliggjandi.

Sá er vinur sem í raun reynist og reyndar einnig sá sem í velgengni samgleðst.

Ég hugsa nú samt að allt verði almennt bjartara þegar við vöknum á mánudaginn.

Lítill fugl hvíslaði því að mér. 

Belgía 12 points, United Kingdom 0 point

Sannarlega mannleg viðbrögð og yfirveguð.  Ég vildi óska að fleiri væru þannig þenkjandi.  Það verður að láta hausinn snúa áfram núna og bjarga því sem bjargað verður.  Til þess að svo megi verða þarf umsvifalaust að setja fólk sem er traustsins vert í forystu æðstu stofnana landsins eins og Seðlabankans. 

Seðlabankinn virðist ekki hafa vald á þeim tækjum sem hann býr yfir.  Hagfræðingar ættu að taka hann yfir umsvifalaust.

Menn sem gera slík mistök sem Seðlabankinn hefur gert á undanförnum vikum og mánuðum eiga ekki að fá annað tækifæri.

Síðan má telja upp úr kjörkössunum hvernig þjóðinni líkaði viðbrögð ríkisstjórnarinnar.  Það kemur alltaf að því að menn verða að svara fyrir gerðir sínar.

Núna er aðalmálið að skapa starfsumhverfi sem þjóðin og ekki síður heimurinn getur treyst.   

Til að klóra í bakkann! 

Belgar vilja tryggja rekstur Kaupþings

Þar small það saman

Það varð að setja sérstök lög til að losa ríkið við skuldbindingar sínar.

Eða hvað þýðir þetta?

Davíð Oddsson sagði í Kastljósi í kvöld að Glitnir yrði hugsanlega ekki til á hluthafafundinum á laugardaginn en ríkið hefur skuldbundið sig til að leggja hlutafé í bankann og eignast þar með 75% í honum.

Vonandi er það rétt hjá Davíð að við réttum fljótlega úr kútnum.

Þetta er að verða alveg nóg í bili!

 

 

FME tekur Glitni yfir

Var þetta grín?

Þjóðnýtinga Glitnis virðist missa marks að þessu sögðu.  Það eina sem var að í Íslensku hagkerfi er samkvæmt þessu fyrirspurn stjórnarformanns Glitnis um hugsanlega aðstoð Seðlabankans við Glitni. 

Já miikið blossaði vandamálið upp á þeim punkti og hefur svo hjaðnað jafn skyndilega.

Trúverðugt?

Almenningur í landinu á betra skilið.  

Það hefur greinilega ekki fundist nein lausn eða ekki náðst samstaða um málið.

Ekki þörf á aðgerðapakka

Glitnir

Ég fór á dekkjaverkstæði á mánudagsmorguninn til að láta setja heils árs dekk undir fyrir Strandaferðina.  Þar kom inn gamall maður og segist vera með dekkin í bílnum en hann þori ekki að láta skipta um þau strax þar sem hann viti ekki hvort hann eigi fyrir því.  Það sé búið að þjóðnýta Glitni og hann sé einungis með kort þaðan og viti hreinlega ekki hvort hann eigi neitt lengur?  Bankarnir væru allir lokaðir.

Okkur þótti þetta tíðindum sæta og umræður sköpuðust og urðu nokkuð líflegar.  Maðurinn fór en kom að vörmu spori aftur og sagði að þetta væri víst í lagi og að hann ætlaði því að láta skipta um dekkin. 

Umræðurnar í kjölfarið á þessum gjörningi þekkja allir og eru margir þeirrar skoðunar að um of harkalega aðgerð hafi verið að ræða.  Þorsteinn Már Baldvinsson velti upp þeirri spurningu í Kastljósi hvort seðlabankastjóri Davíð Oddsson væri vanhæfur í málinu sökum miður heppilegra tengsla við aðaleiganda bankans Jón Ásgeir Jóhannesson.

Verður nú Landsbankanum færður Glitnir á silfurfati?  Björgólfsfeðgarnir eru "í náðinni" segja sumir.

Er það plottið?  

Valgerður Sverrisdóttir þingmaður Framsóknarflokksins og fyrrverandi viðskiptaráðherra, benti réttilega á að einungis það að orðrómur um vanhæfi Davíðs væri á sveimi væri grafalvarlegt mál. 

Stefnuræða Geirs H. Haarde í kvöld skýrði málin ekki mikið og ég var sammála Steingrími J. Sigfússyni þegar hann sagðist ekki ætla að eyða orðum í stefnuræðuna þar sem hún hefði ekki sagt neitt.

Davíð Oddsson mætir á ríkisstjórnarfund og stingur upp á þjóðstjórn! Þorgerður Katrín svaraði því skýrt og skorinort að hann væri komin út fyrir sitt verksvið. 

Hvað er í gangi?

Maður hlýtur að spyrja sig hvort svona aðgerðir af hálfu stjórnvalda með Glitni að frumkvæði Seðlabankastjóra séu til þess fallnar að skapa sterkari stöðu?

Skapar þetta ekki meiri óróa en öryggi? 

Mín tilfinning er sú.  

Alla vega ef ég miða við gamla manninn sem vildi vera viss um eiga fyrir því að láta skipta um dekkin hjá sér.