Hagfræðingar í málið.

Ég vona að það sé rétt að hagfræðingar séu að yfirfara tilögur að stjórnarsáttmála.

Framsóknarflokkurinn setur sífellt fleiri skilyrði og tefur málið.

Kannski er formaðurinn að "stimpla" sig inn en þegar ég hef það í huga að þessi sami Sigmundur Davíð kom fram með miklu offorsi strax eftir bankahrunið og sagði að við mættum engan tíma missa þar sem eigur þjóðarinnar væru að brenna upp.

Skýtur það skökku við að hann sé nú flöskuhálsinn í að mál fái skjóta afgreiðslu.

Mikil er ábyrgð Sjálfstæðisflokksins í málinu að hafa siglt þjóðarskútunni í stand og komið síðan í veg fyrir að losa hana af standstað með því að þverskallast við að taka á málum Fjármálaeftirlits og Seðlabanka.

Ég skrifa þessa stjórnarkreppu fyrst og fremst á "mína menn" í þeim flokki.  Vegna þess að ég kaus þá þá geri ég mestar kröfur á þá.  Þeir brugðust mér.

Þeir kölluðu þetta yfir þjóðina með slælegum vinnubrögðum.

Auðvitað átti að taka á málinu með afsögnum þeirra sem báru ábyrgð.

Það var grundvallarskilyrði fyrir því að endurreisn og uppbygging gæti hafist.

Nú hefur Framsóknarflokkurinn keflið og notfærir sér neyð þjóðarinnar sér til framdráttar.

Þökk sé Sjálfstæðisflokknum! 

Lifi lýðveldisbyltingin. 

 

 

 

 

Telur forsendur fyrir stjórn

"Framsóknarhækjan"

Framsóknarhækjan er látin duga.

Við skulum vona að það reynist nýrri ríkisstjórn happadrjúgt.

Ég hef ákveðnar efasemdir um gang mála og þá sérstaklega þá staðreynd að Framsóknarflokkurinn virðist hafa öll tögl og hagldir í þessari minnihlutastjórn.

Kannski er ekki ástæða til að hafa áhyggjur af því og kannski er Framsóknarflokkurinn í fullri einlægni að taka til í eigin ranni.

Eitthvað hugsa ég að það sé þó erfitt fyrir flokk með langa sögu og rótgróin og spillt tengsl víða í samfélagið að umbreytast í "móðir Teresu" á einni nóttu.

Frjálslyndi flokkurinn er samkvæmt Guðjóni Arnari í stjórnarandstöðu á komandi "kjörtímabili" sem mun væntanlega standa alveg fram í endaðan apríl eða byrjum maí.

Það mun mest mæða á Framsóknarflokknum í þessu samstarfi og því hvað hann er tilbúinn að leggja nafn sitt við.

Framsókn er í framsókn þar til annað kemur í ljós. 

 

 

 

Frjálslyndir ekki með

Ný ríkisstjórn í dag getur hún breytt einhverju?

 Það er spurningin...

Össur búin að fella ríkisstjórnina-fyrirfram

 

Það verða ekki gefnar fleiri yfirlýsingar fyrr en ríkisstjórnin verður kynnt sagði Steingrímur. 

Hótfyndni Össurar um að ef einhver komi út af fundinum þá sé búið að reka hann úr ríkisstjórninni kemur kannski í beinu framhaldi af yfirlýsingu hans fyrr í vetur þar sem hann kom af ríkisstjórnarfundi í ráðherrabústaðnum.  

Þá sagði hann "lifi byltingin".

Mér fannst það gott hjá honum og gaf tóninn fyrir áframhaldandi mótmæli gegn þeirri ríkisstjórn sem Össur sat þá í.

Orð Össurar nú má kannski túlka sem svo að málin séu eldfim og viðkvæm.

Menn taka sig nefnilega mis alvarlega.

Það er greinilegt að ýmsar yfirlýsingar Össurar og co hafa farið fyrir brjóstið á Steingrími og co.

Ég furða mig á einu og það er það að formaður flokks (Steingrímur) taki það í mál að aðili úr örum flokki sem ekki er formaður hans fái forsæti í ríkisstjórninni?

Samfylkingin er í molum og VG heldur lífinu sem Sjálfstæðismenn blésu í "Frankenstein" með því að leggja óflekkað nafn sitt og mannorð að veði á þann hátt sem þeir nú gera. 

Skýtur það ekki skökku við? 

 

Ríkisstjórnin kynnt í dag

Það er gaman að mótmæla

Ég held ég mæti bara á laugardaginn líka!

Ég tel að þessi ríkisstjórn sem nú sest á valdastólana sé þegar farin að slá af kröfum sínum

Þau segjast ekki hafa mikinn tíma á sama tíma og þau gagnrýna harðlega fráfarandi ríkisstjórn og sjálf sig (með réttu) fyrir seinagang.

Síðan bankarnir hrundu hefur lítið gerst sem sýnilegt er almenningi.

Enginn tekið ábyrgð fyrr en á síðustu metrunum og þjóðinni sýndur hroki.

Ný ríkisstjórn má heldur ekki draga til baka ákvörðun um hvalveiðar. Í öllu atvinnuleysinu eigum við að styðja við innlenda atvinnuvegi og sjálfbæra nýtingu okkar auðlinda.

Það er enginn að tala um neina ofveiði.

Það er gaman að mótmæla og ég mun tromma með á laugardaginn. 

Mótmælt við stjórnarmyndun

Steingrímur segi NEI við Ice Save

Það besta sem getur gerst núna er að Steingrímur J. segi nei við Ice Save dellunni.

Segðu nei nei nei og aftur nei Steingrímur.

Þú ert hvort eð er NEI maðurinn! 

Þó svo að önnur ríkisstjórn komi eftir þrjá mánuði þá gefur það tóninn fyrir sanngjarna samninga en ekki nauðungasamninga eins og Evrópusambandið hafði í frammi gagnvart okkur.  Eins og Geir Haarde og Ingibjörg Sólrún lögðust á bakið fyrir.

Framsóknarflokkurinn er lunkinn við að koma sér í gríðarlega valdaaðstöðu.

Nú er nóg fyrir Sigmund Davíð að gretta sig lítillega þá fær hann allt sitt fram hjá komandi ríkisstjórn.

Hvernig ætlar Jóhanna að tækla það? 

 

 

Ekki óskaríkisstjórn Sigmundar Davíðs

Þjóðin vill koma að Stjórnlagaþingi ekki bara flokkarnir á þingi

Mér sýnist ef ég er neikvæð að ný ríkisstjórn muni fara fram úr sjálfri sér og glata trausti á fyrstu metrunum.

Ef ég er jákvæð þá er þessi krafa Framsóknarflokksins um stjórnlagaþing skref í átt að breytingum.

Ég dreg þó í efa að Framsóknarflokkurinn sé með brennandi lýðræðisþörf þjóðarinnar í huga eða þann eindregna vilja hennar að leggja niður flokkaveldið.

Þjóðin er nefnilega vöknuð og við munum ekki una öðru en Lýðræðisbyltingu.

Hegðun allra stjórnmálamanna í öllum flokkum kallar á hana. 

Samþykkja stjórnlagaþing

Hverjir verða ráðherrar virðist aðal issjúið-BURT MEÐ SPILLINGARLIÐIÐ!

Ég undrast mjög þann fréttaflutning sem dynur á okkur nú þegar landið er að sökkva.

Karp um kosningadag, rígur um ráðherraembætti og lesbískur forsætisráðherra virðist vera aðalmálið hjá blessuðum fréttastofunum sem nota bene leitast við að endurspegla það sem er efst á baugi hjá flokkunum sem eiga í viðræðum um stjórnarmyndun.

Hver sér um upplýsingagjöf fyrir hönd þeirrar ríkisstjórnar nú sem er í burðarliðnum?

Greinilega ekki neinn fagmaður!

Svo er forsetinn af og til að senda pílur í stað þess að lúta vilja þjóðarinnar sem krafist hefur þjóðstjórnar eða utanþingsstjórnar undanfarnar vikur og mánuði.

Er okkur ekki viðbjargandi? 

 

Nær Evrópu með Vinstri grænum

Tími flokksgæðinga er liðinn

Ég vona að ný ríkisstjórn átti sig á því að tími flokksgæðinga er liðinn.

VG sem hafa deilt harkalega á Sjálfstæðisflokk og Samfylkingu fyrir að raða sér og sínum á garðann hljóta að sjá til þess að nú verði alger uppstokkun á innviðum og klíkumyndun kerfisins.

Þeir verða að leita til erlendra aðila til að stýra Seðlabankanum og Fjármálaeftirlitinu.  

Allt annað er ósannfærandi og kallar á tortryggni sem þau verða að uppræta.

Einhvern veginn hef ég grun um að hin rótgróna þörf flokkaveldisins verði eins og illgresi að þvælast fyrir við uppbygginguna.

Því fyrr sem við losnum við flokkaveldið því betra. 

Höfum við efni á einhverju?

Spyr sú sem ekki veit.

Ég vona innilega að Jóhönnu takist ætlunarverk sitt sem hlýtur að vera að stuðla að velferð þjóðarinnar eins og hún reyndar boðar.

Ég er reyndar hóflega bjartsýn á að svo verði.

Það er bull að standa í stjórnarmyndun núna.

--

Góðu fréttirnar eru þær að það verða kosningar fljótlega. 

Lifi lýðveldisbyltingin. 

 

Býst við stjórn á laugardag