Hver heldur með hverjum og hvers vegna?

Mér finnst dálítið fyndið að velta fyrir mér þeirri áráttu okkar að halda með ákveðnu liði í íþróttum.  Hvers vegna þetta lið en ekki hitt?

 

Tölum um fótbolta! 

Oft er það "heimaliðið" sem við höldum með af mikilli áfergju.  Stundum er það vegna þess að einhver sem við þekkjum spilar með liðinu eða að einhver sem við þekkjum heldur með liðinu.

Þegar kemur að liðum utan landsins t.d. í enska boltanum flækist málið verulega.  Sumir eru Liverpoolarar bara af því og aðrir Manchester United aðdáendur af því bara.  

Hvað veldur?  Ég er alger "flokka-flakkari" í þessum efnum. Synir mínir hafa haldið mjög sterkt með liðum í enska boltanum.  Einn heldur með Liverpool, tveir héldu lengi vel með Arsenal og ég gerði það líka um tíma.

Svo hélt ég með Chelsea þegar Eiður Smári lék með þeim og um tíma hélt ég með Manchester United vegna þess að John læknir Bendikz heldur með þeim.

Í dag er ég alveg laus við að halda með einum eða neinum.  Sé ekki tilgang með því. 

Árfram Þróttur!!! 

Athugasemdir

[Sigríður Hrönn Elíasdóttir, 3.5.2008 kl. 23:05]

Þetta var nú nokkuð einfalt í mínum uppvexti í Súðavík. Stelpur og strákar voru saman í liði en í þorpinu bjuggu þá um 250 manns og við bara skiptum þorpinu í tvennt, þeir sem bjuggu framfrá voru Arsenal og þeir sem bjuggu niðurfrá voru Leeds, þannig var nú það á mínum ungdómsárum og á fermingardaginn var ég horfinn úr veislunni alltof fljótt því  ég var farin að spila fótbolta með strákunum.  Svo villtust einhverjir þorpsbúar frá þessum liðum þegar þeir urðu eldri og fóru að halda með Manchester United, Liverpool og fleirum. Sonur minn hefur reyndar alltaf haldið með Liverpool enda var þessi skipting á þorpinu víst lögst af þegar hann byrjaði að pota í bolta.