Borg eða smáþorp

Ég er svo heppin að búa í "ómanneskjulegu" háhýsi í Reykjavík.  Ég hrekk alltaf í kút þegar vinstri grænir eða samfylkingarmenn nota þetta orðalag þegar skipulagsmál ber á góma.  Hvað er "ómanneskjulegt" við háhýsi í borg?  Ég hef sjaldan séð skynsamlegri sýn á Reykjavík en þá sem Hrafn Gunnlaugsson sýndi okkur í ágætri mynd um hans hugmyndir að framtíð Reykjavíkur.  R-listinn beytti sér fyrir því að "þétta byggð" eins og það var kallað.  Gott og vel en það hefur einnig verið farið upp um fjöll og firnindi með lágreista byggð á undanförnum árum.  Í valdatíð R-listans myndaðist mikill lóðaskortur í Reykjavík og flúðu þá Reykvíkingar í nálæg byggðalög sem kappkostuðu að hafa lóðir.  M.a. til Kópavogs þar sem nota bene, "ómanneskjuleg " háhýsi hafa sprottið upp eins og gorkúlur og setja skemmtilegan "borgarblæ" á t.d. Salahverfið og fleiri hverfi þar í bæ.  Hefði nú ekki verið dálítið skynsamlegt að byggja upp í loftið í henni Reykjavík líka?  Þess í stað er byggt lágt og byggðin teygð í láréttri stöðu um holt og móa.  Byggðar 20-30 "Hólmavíkur"með alles og tilheyrandi einkabílaakstri milli þeirra og mengun sem því fylgir.  Ég er úr sveit og þegar ég er í sveit vil ég vera þar.  Ég bý hins vegar í borg og þar vil ég hafa BORG.  Iðandi mannlíf og stutt í alla þjónustu.  Það má velta því fyrir sér hvort er manneskjulegra að búa í háhýsum í borg og ganga allra sinna ferða um nágrennið eða búa í einni af 10-20 "Hólmavíkum" og þurfa að þeysa á milli staða í eiturspúandi einkabíl?  Mætandi öllum hinum eiturspúandi einkabílunum frá öllum hinum "Hólmavíkunum" í henni Reykjavík.

Athugasemdir

[Sigfús Sigurþórsson., 19.4.2007 kl. 23:17]

Góður pistill Vilborg, gott og þarft að skrifa um þetta mál.

[Ester Sveinbjarnardóttir, 19.4.2007 kl. 23:23]

Þetta held ég flokkist undir pólitískt skítkast.  Ef hamrað er nógu oft á einhverju endar með því að fólk fer að samþykkja það.

[Vilborg Traustadóttir, 19.4.2007 kl. 23:35]

Takk Sigfús.  Er oft undrandi á málflutningi þeirra sem telja sig "ultra-umhverfissinna" .  Emil Njarðvík er ábyggilega fín.  Ester átt þú við "háhýsapólitíkina" að þau séu ómanneskjuleg að sumra mati?

[Herdís Sigurjónsdóttir, 20.4.2007 kl. 09:12]

Já ég eeeeeeeeeelska skipulagsmál. ÉG gæti ekki verið meira sammála þér og næ því ekki þegar verið er að tala um ómanneskjulegar blokkir, bíddu eru þær ekki einmitt fyrir fólk?

Við í Mosfellsbænum höfum valið að hafa hér lágreista og dreifða byggð og aukinn þáttleika í kring um miðbæinn og fólki sem líkar þessi sýn flytur í Mosó...fólk á að hafa val og um það snýst málið. Hjá okkur er líka búið að byggja litlar blokkir bæði venjulegar og svo fyrir 55 ára og eldri, því það vantaði þær á markaðinn fyrir fólk sem aldi að búa í blokk með engum garði en með lyftu o.s.frv.

En bottom line ... valfrelsi einstaklingsins 

[Vilborg Traustadóttir, 20.4.2007 kl. 13:25]

Mér finnst einmitt Mosfllsbær vel heppnað dæmi um gott skipulag.  Háu byggingarnar eiga að vera sem næst miðbænum eða öflugum verslunarkjarna (Smáralind, Kringlan o.s.frv), svo fólk geti rölt í bæinn eftir vinnu eða með barnavagninn á daginn án þess að flengjast fyrst óraleið í bíl.  Skutlaði einum heim í blokkirnar50 + við Blikastaði um daginn, mjög sjarmerandi og skemmtileg byggð.  Þarna voru lágar blokkir og háar í bland ásamt öðrum valkostum.  Að vísu er ég alltaf jafn áttavillt á hringtorgunum ykkar en það er á öllum þessum nýju hringtorgum sem ég er það.  Ekki bara í Mosó.

[Ragnar Bjarnason, 21.4.2007 kl. 11:15]

Skemmtilegar pælingar. Takk fyrir mig.