Gettu

 

Hún kemur óboðin

þegar þú hefur beðið hennar of lengi

og væntir hennar síst.

 

Þá kemur hún svo kitlandi

og kollvarpar öllum þínum áformum.

 

Stríðin og storkandi

dansar hún inn í hjarta þitt

eftir krókaleiðum.

Alvarleg og ákveðin

eins og ekkert sé til fyrirstöðu.

 

Að mótmæla er til einskis.

Hún hlær að þér og hvíslar.

 

"Hvað er mikilvægara en ég?

Ég er allt,

ég er ekkert,

ég er ástin."

 

 

  Höf: Vilborg Traustadóttir