Bátar, kostur og gullbrúðkaup

Bátarnir okkar tveir Hafgammur og Nao eru innpakkaðir og tilbúnir á kerrum til flutnings á Strandirnar. Skútan Ippa verður heima um sinn.  Hluta flotbryggjunnar var einnig komið á vörubíl sem fer norður á Strandir í kvöld eða á morgun. Verslaði áðan fyrir a.m.k. 10 daga úthald.  Gott að búa að þeirri reynslu að hafa verið ráðskona í vegavinnu þegar skipulagt er svona fram í tímann.  Svo bætir maður í sarpinn í hverri búð á leiðinni eins og hver búð sé sú síðasta fyrir eyðimerkurvist.  Byrja venjulega á að fara í gegn um skápa og fleygja útrunnum marvælum, kryddi o.þ.h. sem dagar uppi yfir veturinn í húsinu okkar vestra.   Það er norðan átt en hæglætisveður sýnist mér samt að verði.   Foreldrar bestu vinkonu minnar eiga gullbrúðkaup um helgina og þau ásamt fjölskyldunni munu koma til okkar og halda upp á það á Ströndunum.  Mikill heiður fyrir okkur að fá að taka á móti þeim og aðstoða eftir föngum á þessum merku tímamótum í lífi þeirra.  Sérstaklega þar sem ég var heimagangur hjá þeim  um lengri eða skemmri tíma á árum áður.  Ég hlakka mikið til og maður lætur ekki veðrið stjórna sér þegar þannig stendur á.  Þvert á móti gerum við allar þær ráðstafanir sem mögulegar eru til að helgin verði ánægjuleg.   

Athugasemdir

[Herdís Sigurjónsdóttir, 9.7.2007 kl. 17:55]

Búin að panta sól  og gott veður og því er bara eins gott fyrir okkur að mæta bara með leikskólafötin, en hef ég orðið vör við það að það er alltaf gott veður hjá Sædísi Erlu, enda við öllu búin í leikskólanum.

Ég hlakka ekkert smá til að mæta á svæðið og veit ég að eins er með alla hina ferðalangana og Neffríði systur mína líka  .

[Vilborg Traustadóttir, 9.7.2007 kl. 22:02]

Hehehehehe góð...  En vonandi verður hún hress sem aldrei fyrr um helgina hún stóra systir þín.  Hlakka líka til.  Ekki gleyma sundfötunum og sólgleraugunum.

[Herdís Sigurjónsdóttir, 9.7.2007 kl. 23:18]

Við pabbi liggjum yfir kortum og ferðabókum, þú veist hann þarf alltaf að ráða  enda á leið í pílagrímaferð í Kjörvog að hitta andans áa.

[Vilborg Traustadóttir, 10.7.2007 kl. 00:11]

Við bjóðum okkur á Kjörvog að sjálfsögðu!  Náfrændi minn býr þar.  Sonur Önnu frænku (systir Línu sem Kristín þekkir). Svo er pósthúsið þar ef við viljum senda póstkort úr sveitinni.  Ég er EKKI nettengd á Djúpuvík.

[Herdís Sigurjónsdóttir, 10.7.2007 kl. 09:27]

Ég þarf einmitt að senda póstkort til Bosníu, en félagi minn er í friðargæslu þar og  hef ég lýst yfir póstkortastríði í sumar. Hann var að segja mér að amma hans væri í Ófeigsfirði .... þetta Strandafólk, bara eins og Siglfirðingar sem búa bara annars staðar.

Ég hlakka mikið til og er að skella mér inn á Akureyri til að sækja frumburðinn, því enginn vill missa af Djúpuvík.

Gott með bloggleysið, við getum þá bara talað saman í staðinn