Norðurport - auglýsing

Smelltu á myndina til að sjá hana stærri

Allt sem við viljum er friður á jörð

Það er til fyrirmyndar að færa lögreglumönnum blóm.  Mikið dáist ég að hugkvæmni og hugulsemi þeirra sem færðu þeim blómin.

Samstaða fæst með friði. 

Vér mótmælum allir!

Friður og blóm á Austurvelli

Halló Akureyri

Ég er stödd fyrir norðan eins og fram hefur komið.  Fyrir norðan er að sjálsögðu á Akureyri.  Við systurnar brugðum okkur í bæinn að kaupa striga fyrir myndlistarnámskeið sem við erum að fara á um helgina.

Við komum víð í Landsbankanum, fyrrverandi vinnustað systur minnar til að taka út aur fyrir helgina. Þar stóð vörður frá Securitas fílefldur á verði.  Ég fór að forvitnast og komst að því að kona nokkur sem var ósátt við það sem eftir var á hennar reikningum og stormaði út með leðurstól og ætlaði að taka hann með sér heim.

Mér varð nú að orði við vörðinn hvort það mætti setjast í stólana.  Það væri kannski lím í þeim eins og stólunum í Seðlabankanum!

Svo er það umhugsunarefni að verðir frá Securitas voru kallaðir út vegna leðurstóla en meðan viðskiptavinir bankans voru að ganga um sali bankans með aleigu sína í plastpokum eins og sást víða, þótti ekki ástæða til að verja þá!

Né heldur þótti ástæða ril að verja starfsfólk bankanna þegar reiðir viðslkiptavinir voru á ferð eins og mörg dæmi sanna né kalla til áfallahjálp því til stuðnings?

Mér fannst tómlegt og kuldalegt í bankanum en ég hef ekki komið í hann eftir að honum var breytt fyrr en nú.  Þetta er gamalt og virðulegt hús en með ótrúlegum hætti hefur tekist að slíta sálina innan úr því.

 

"Ekki væri á það ábætandi".

Skondinn nýr málsháttur hjá Árna M. Mathiesen.  "Ekki væri á það ábætandi". 

Svona í anda Ingu á Eyri sem var einstaklega hress og skemmtileg kona á Siglufirði.

Inga var dálítið mismælin og margar gullperlur voru hafðar eftir henni.  Það er alveg hugsanlegt að einhverju hafi verið logið á hana en skemmtileg var hún og skjót til svars.  Enda eiga góðar sögur aldrei að líða fyrir sannleikann.

Einhvern tíma var sett innrétting til bráðabirgða hjá Ingu meðan beðið var eftir nýrri.  Inga sagði þannig frá.  "Ég var að fá nýja eldhúsinnréttingu frá Bráðabirgða" !

Ég er ekki frá því að Siggi á Eyri (eiginmaður Siggu Júllu Möggu), sonur Ingu hafi erft þessa skemmtilegu eiginleika hannar. 

Einu sinni sem oftar koma Siggi í heimsókn út á Sauðanes og var að ræða búskap við pabba.  Pabbi var með um 100 kindur, 2 kýr og eitthvað af hænsnum og geitum.  Þá var hagkvæmt að vera með skinnaframleiðslu og mörg refa og minkabú sett á laggirnar.  

Nú átt þú að fara "beint í blárefinn"! sagði Siggi þá á sinn skemmtilega og hressilega hátt.

Samskipti við IMF í hnút

Að sigla beitivind

Það er í þeim aðstæðum sem nú eru uppi í þjóðfélaginu sem við leitum til baka í þjóðareinkennin.  Gamlir siðir, matarvenjur og orðtæki veita okkur ómælt öryggi.

Við förum í öll gömlu gildin okkar.  Við borðum þjóðlegan mat.  Eldum kjötsúpu, saltkjör og baunir, svið og við tökum slátur. 

Við sjóðum ýsu (jafnvel þverskorna), búum til fiskibollur og bökum brauð. 

Ekki endilega vegna þess  að þessi matur sé svo ódýr heldur miklu frekar vegna þess að hann veitir okkur öryggi.

Við tökum fram prjónana og prjónum peysur, við saumum og við búum til hluti sem við keyptum áður. Það veitir hugarró að vera virkur í því að "búa í haginn" fyrir sig og sína. 

Við tókum eftir því að stjórnmálamenn notuðu óspart líkingamál þegar hið alvarlega efnahagsástand var kynnt fyrir þjóðinni, og gera enn.

Við erum "í miðjum brimskaflinu" við erum vön því að "gefi á bátinn" við "stöndum af okkur storminn" við verðum að "stíga ölduna" í þessum mikla "mótbyr" og "rifa seglin", sem sagt "halda sjó". 

Mitt uppáhaldsorðtæki er að "sigla beitivind".  Það er að "í mótbyr" eða þegar á móti blæs þá er seglunum beitt þannig upp í vindinn að skútan siglir ótrauð áfram. Þótt hún fari kannski ekki eins hratt og ef um "beggja skauta byr" væri að ræða þá heldur hún siglingunni áfram.  Oft er hægt að ná býsna góðri siglingu með því að "sigla beitivind".

Það er nauðsynlegt í þessari "holskeflu" sem nú hellist yfirr okkur að sjá "sóknarfæri" og þá er skynsamlegt að "beita seglum eftir vindi". 

 

Er hrekkjavakan komin til að vera?

Með aukinni "hnattvæðingu" tökum við Frónbúar sífellt upp fleiri siði.  Nýbúarnir okkar eru líka leiðandi í að halda uppi siðum sem þeir eiga að venjast.  Það er vel.

Ég passaði fyrir fyrir tengdadóttur mína í gærkvöldi en hún brá sér í hrekkjavökupartý.

Svo er það bara spurning hvort undanfarnar vikur hafa verið ein samfelld hrekkjavaka í boði Seðlabankans? 

 

 

 

Hrekkjavökusvipur á skemmtunum

Kláraði hringinn

Ég kláraði hringinn næstum því í dag.  Þ.e.a.s. í eldhúsinu.  Nú er ég búin að fara í gegn um alla eldhússkápana, þrífa þá og taka til í þeim.  

Að vísu er eftir að afþýða ísskápinn og þrífa skápinn undir vaskinum en það verður gert alveg á næstu dögum.

Svona þegar ég gef mér tíma í það.

Ég var boðin í siginn fisk og selspik til mömmu og pabba í kvöld.  Þvílíkt lostæti!

Til að kóróna máltíðina buðu þau upp á ávexti og rjóma á eftir og svo auðvitað kaffi.

Horfðum svo á fótboltann.  Það var gaman að finna þjóðernisstoltið blossa upp sem aldrei fyrr þegar "stelpurnar okkar" unnu Írana og komust þar með á EM.

Þjóðernisstoltið hefur beðið hnekki að undanförnu, þökk sé misvitrum pólitíkusum og stofnanavæddum eftirlitsmönnum sem föttuðu ekki sitt hlutverk eða hreinlega nenntu ekki að sinna því.

Þjóðernisstoltið blossaði upp og ég fann tárin koma fram í augnkrókana. 

Það hef ég ekki fundið síðan sautjánhundruðogsúrkál. 

Takk stelpur!   

Norðmenn kveikja á "fattaranum"

Þetta eiga mörg okkar eftir að gera.  Ég áttaði mig t.d. á því í dag að dömubindin sem ég nota alltaf voru ekki til í tveimur verslunum.

Maður skyldi þó ekki enda með bómullarpakkann gamalkunna þegar "Rósa frænka" kemur í heimsókn?

Ef maður er heppinn!

Kannski þurfum við að fara að grípa til annarra ráða og róttækari eins og að láta hreinsa draslið bara í burtu?

Ég borðaði rúsínuslátur og lifrarpylsu sem við mamma gerðum saman á fimmtudaginn, í sunnudagamatinn ásamt fjölskyldunni okkar. 

Ég var búin að gleyma hvað þetta er góður matur en ég hef ekki gert slátur í "góðærinu" undanfarið. 

Kreppan hefur sannarlega mörg andlit og þetta er rétt að byrja. 

 

Eru nú fyrst að átta sig á alvarleika málsins

Stjörnuspáin mín af mbl.is

STJÖRNUSPÁ

Steingeit: Þú reynist vera fjölhæfari en þig óraði fyrir. Þú ert sannur þúsundaþjalasmiður sem hefur endurnærandi áhrif á fjölda fólks umhverfis þig.

 

--

Vona að satt reynist.  

Ég er búin að vera svo fokreið yfir ástandinu sem búið er að kalla yfir okkur.  

Geðlæknir sagði í sjónvarpinu að reiðin gæti verið góð því hún virkjaði kraftinn í að gera eitthvað í málunum.  

Best að vinda sér á framkvæmdastigið.

Knús í allar áttir.

Góðan daginn!

Góðan daginn segir maður gjarnan á morgnana við þá sem maður hittir svona í morgunsárið.

Hvort sem það er ektamakinn,  nágranninn í lyftunni eða stúlkan í bakaríinu.   Yfirleitt fær maður sama svar til baka.  Góðan daginn!

Stundum hef ég velt fyrir mér ef einhver svaraði mér einhverju öðru eins og t.d.  "hvað er svona gott við hann"  eða "er kominn dagur hjá þér"?  

Hvernig yrði mér við? 

Ég lenti í því í tvígang um daginn að segja góða kvöldið um miðjan dag.  Þetta var dálítið pínlegt því þetta var í vinnunni hjá manninum mínum.  Ég fóðraði þetta í fyrra skiptið með einhverju aulalegu eins og þú varst eitthvað svo "kvöldlegur" þarna bak við borðið.

Svo gekk ég fyrir horn og sagði glaðlega við tvo næstu menn,  góða kvöldið!  Já svaraði annar þeirra, og við manninn minn,  við förum þá bara heim núna.

Ég ákvað strax að halda mig fjarri vinnustað og vinnufélögum mannsins míns um tíma.  

Alla vega fram að næstu árshátíð.  Þá mun ég vafalaust ganga keik í salinn og bjóða góðan daginn!