Olía á striga

Ég var á myndlistarnámskeiði í kvöld og mikið er það gefandi og gaman.  Ég málaði uppstillingu og síðan gerði ég nokkra "verðbólgudrauga" sem ég vona að við getum "kveðið niður" helst á næsta námskeiði, jafnvel strax í næsta tíma.  

Að lokum gerði ég skerið sem Davíð Oddsson er að "þvælast fyrir á" en Davíð sést reyndar ekki enda komin á "bólakaf" og "þjóðarskútan" er horfin úr mynd.  

Hins vegar sést "brimskaflinn" sem við erum í mjög vel og "öldurótið" hverfist í kring um skerið.  "Stormurinn" æðir í loftinu og það "næðir um" í "boðaföllunum".

Myndin ber það með sér að okkur er eins gott að "stíga ölduna" svo við hljótum ekki verra af.

Við sjóndeildarhringinn framundan og handan við skerið má sjá að "storminn hefur lægt" og því augljóst að "öll él birtir upp um síðir". 

Eitt er víst að eftir að hafa sett þetta svona upp á lítinn striga og "búið svo um hnúta" að vandamálið er "úr augsýn" þá líður mér mun betur á sálinni en fyrir námskeiðið.

Nú get ég varla beðið eftir að "kveða niður verðbólgudraugana". 

 

Athugasemdir

[Hulda Margrét Traustadóttir, 30.10.2008 kl. 06:36]

Skemmtileg færsla, svona getur maður unnið sig útúr vandanum með því að mála sig frá honum.

[Sigurveig Eysteins, 30.10.2008 kl. 13:14]

Já... Vilborg þetta er mjög góð leið,  að mála sig út úr vandanum og reiðinni,  ég geri þetta,  mæli með þessu,  best er að koma sér fyrir úti eða í bílskúr,  koma striganum fyrir á gólfi og kasta eða hella málningu með miklum látum á strigann, fara svo með hendurnar í þetta,  þetta er æðisleg útrás,  þetta var kannski heldur mikið fyrir þig???

[Vilborg Traustadóttir, 30.10.2008 kl. 16:59]

Góð hugmynd! ;-)